امریکہ میں پھسے پاکستانیوں کو لے کر پی آئی اے کی پہلی پرواز امریکہ سے روانہ

امریکہ میں پھنسے پاکستانیوں کو لے کر پہلی خصوصی پرواز اسلام آباد روانہ

اسلام آباد: امریکہ میں پھنسے پاکستانیوں کی وطن واپسی کے لیے پاکستان انٹرنیشنل ایئر لائن (پی آئی اے) کی پہلی خصوصی پرواز 200 مسافروں کو لے کر اسلام آباد کے لیے روانہ ہو گئی ہے۔ امریکہ میں پھنسے پاکستانیوں کو واپس لانے کے لیے حکومت پاکستان نےچارٹرڈ فلائٹ کا بندوبست کیا تھا۔ یو این این کے مطابق ایک اور چارٹرڈ پرواز امریکہ میں پھنسے 150 طلبا کو لے کر 11 مئی کو پاکستان آئے گی۔ امریکہ میں پاکستان کے سفیر ڈاکٹر اسد مجید خان افتتاحی پرواز کے انتظامات کا جائزہ لینے کے لیے ائیرپورٹ پر موجود رہے۔ یو این این کے مطابق امریکہ سے وطن واپس جانے والوں کے لیے پاکستانی سفیر نے نیک تمناؤں کا اظہار بھی کیا۔ خیال رہے کہ چند روز قبل قومی ائرلائن (پی آئی اے) نے امریکہ میں پھنسے پاکستانیوں کی واپسی کا پلان مکمل کیا تھا۔ ذرائع کے مطابق امریکی ایئرپورٹ اتھارٹی نے پی آئی اے کی خصوصی پروازوں کے لیے سلاٹ مختص کر دیا تھا.پی آئی اے کی ایک ماہ میں 12 پروازیں امریکہ کے لیے شیڈول کی گئی ہیں جو واشنگٹن، شکاگو، نیو جرسی کے لیے آپریٹ ہوں گی۔ پی آئی اے نے امریکہ میں پاکستانی سفارتخانے کو بھی شیڈول سے آگاہ کر دیا۔ واضح رہے کہ پی آئی اے تاریخ میں پہلی مرتبہ امریکہ کے لیے اپنی براہ راست پروازیں چلا رہی ہے۔ امریکہ محکمہ ٹرانسپورٹ نے پی آئی اے کو اجازت دینے کا مراسلہ جاری کر رکھا ہے۔ جس کے مطابق پی آئی اے ایک ماہ کے دوران ایک درجن پروازیں چلا سکتا ہے۔ ترجمان پی آئی اے کا کہنا تھا کہ براہ راست پروازوں کی اجازت ملک کی سیکیورٹی صورتحال میں بہتری، حکومتی پالیسی اور پی آئی اے کے سیکیورٹی سے متعلق اقدامات کی عکاس ہے۔ یو این این کے مطابق ان کا کہنا تھا کہ وزیر اعظم عمران خان نے ذاتی طور پر امریکہ پروازیں چلانے اور وہاں پھنسے پاکستانیوں کو جلد از جلد واپس لانے کیلئے اقدامات کیے۔ یو این این کے مطابق پی آئی اے کے سی ای او ائر مارشل ارشد ملک کا کہنا تھا کہ پی آئی اے امریکہ کی ریلیف پروازیں چلائے گا جہاں ہزاروں پاکستانی پی آئی اے کے منتظر ہیں۔ پی آئی اے ان میتوں کو بھی بلا کسی معاوضے کے واپس لے کر آئے گا جو دیار غیر میں چل بسے ہیں۔ واضح رہے کہ پی آئی اے نے کبھی براہ راست امریکہ کے لیے پروازیں نہیں چلائیں بلکہ پی آئی اے کا امریکہ آپریشن براہ راست پروازوں کی اجازت نہ ہونے کے باعث یورپ یا برطانیہ کے ائرپورٹس سے سیکیورٹی کلئیر ہو کر جاتی تھیں۔

Leave a Reply

Your email address will not be published. Required fields are marked *

*

Powered by Dragonballsuper Youtube Download animeshow